.
تاريخ نشر البوست. سنة 2018 - لكني حدثته في 2023
وممكن تحدث تغييرات
أول مرة لك في كوميكون؟
هذي تجاربي الشخصية اللي بالإمكان تستفيد منها
وان شاء الله اكون أفدت لو شخص واحد 💜
1- حط أسعارك بخط كبير و واضح أمام كل منتج
لأنه
أولا، كثير من الناس يفضلون الإنسحاب عن شراء المنتج لعدم وجود السعر تجنباً للمفاجأة
او الاحراج عند السؤال و يطلع السعر أكثر من المتوقع. لما تحطي سعرك تحافظ على 80% من نجاح مبيعاتك.
ثانياً، بسبب الزحمة والأصوات العالية وأصوات السماعات ومكبرات الصوت،
احتمال كبير لما الزبون يسألك عن سعر المنتج، تجاوبه ب سعر ويسمعه غلط
ويتسبب موقف الدفع في احراج الطرفين لعدم تطابق المبلغ بالسعر
ثالثاً، ممكن يكون فيه زحمة ناس حواليك و ثلاث أشخاص يسألون عن ثلاث منتجات بنفس الوقت
وتجاوب شخص ب سعر و يسمعك شخص ثاني ويدفع غلط.
رابعاً، دايما وجود السعر على المنتجات، في حياتنا المعتادة، يعطي إيحاء بمصداقية البائع
خامساً، لما أحطي أسعاري، اوفر على نفسي وعلى الزبون وقت وجهد وهذا شي جيد.
=====================================================
2- اذا ماعندك مرافق او مساعد، خل عندك أكل خفيف أو سناك - تهريب-
لأنه
ممكن يكون فيه زحمة عندك او في المعرض بحيث انك ماتحصل فرصه تروح تاكل،
و طوابير على مطاعم القاعة تسبب في تأخيرك.
=====================================================
3- يفضل وصولك ب وقت مبكر، في أول يوم معرض
لأنه
راح يكون فيه طوابير لاستلام تصاريح الدخول
و إجراءات إدخالك مما قد يؤدي إلى تأخيرك
=====================================================
4-في المعرض، خلي عندك
فكة/خردة/صرف/أنواط كاش
money change
لأنه
نص الناس ماراح يكون عندهم فكة وراح يعطونك أنواط كبيرة.
update
صار عندنا الدفع ب البطاقة ب برنامج زينة
=====================================================
5- اذا محتاج يكون معاك كاش لنفسك للشراء او للطعام
يفضل تسحب المبلغ من ماكينة الصراف الآلي الموجودة بالمعرض ب أول يوم وأول الصباح
لأنه
الماكينة لها حد معين للمخزون و ممكن ينتهي ب أي ساعة بسبب الزحمة، كما يحدث في أغلبية المعارض الكبيرة.
=====================================================
6- اذا محتاج تكون طاولتك بجانب طاولة صديقك،
يفضل انه واحد منكم يعبي استمارة تسجيل وحدة فقط و يكتب الكمية : طاولتين
يعني ون في فاتورة وحدة او في استمارة وحدة
بالعربي، كأنك حجزت طاولتين لأنه ماتكفيك وحدة
لأنه
صعب جدا على المنظمين الاستجابة لمطالب جميع المشاركين ورغباتهم في اختيار مكان الطاولة
فأنت لما تحجز لنفسك طاولتين في فاتورة وحدة، اجباري راح يحطونهم مع بعض
ظناً منهم انك شخص واحد وماتكفيك طاولة وحدة
update
ولكن من 2021 صارو الاداره يعطون المشاركين خريطة , وكل واحد يختار لنفسه مكان
=====================================================
7- اذا يهمك أمر الناس،
. احرص انه يكون بين منتجاتك، منتج ب سعر رمزي وبسيط
يتراوح بين 5 دراهم إلى 20 درهم كحد أقصى
لأنه
فيه غيرك اكثر من 400 مشترك
بعض الزوار يفضلون يشترون شي بسيط من كل طاولة، للذكرى
وماننسى انه في زوار من ذوي الدخل المحدود
و أطفال و جاليات مقيمة
=====================================================
8- اذا يهمك التسويق لنفسك
خصص بين منتجاتك، كمية من منتج غير مكلف، تخصصه كهدية للتوزيع على جيرانك المشتركين والبقية،
والمنتج يحتوي على عناوينك او حساباتك في السوشيال ميديا
مثال على منتجات اقل تكلفة: ستيكرات صغيرة / بوسترات صغيره/فواصل كتب... الخ.
لأنه
أحيانا بعض الناس يرمون البزنس كارد أو يضيعونه أو ينسون منو صاحبه أو يطيح منهم،
بسبب كمية البزنس كارد الهائلة الي يحصلونها بهاليوم بالذات. مثلنا لما نروح معرض
بس لاتستغنون عن طباعة البزنس كارد.
=====================================================
9- اذا اغراضك وأمتعتك كثيرة وصعب نقلها،
يفضل تيب معاك عربة نقل او تحطي اغراضك كلها في شنط سفر
لأنه
لاتوجد عمالة مساعدة في نقل الأغراض
ومكان صف السيارات بعيد شوي بالأقدام عن باب القاعة
=====================================================
10- صديقتي موزة
تقول، حلو لما تحتفظ ب قطعة وحدة من كل منتج تسويه، للذكرى 💜
____________________________
الأسئلة الشائعة FAQ
كيف و وين أسوي لنفسي منتجات؟
مواقع ومطابع لصنع منتجات
بعضهم جربتهم شخصيا وبعضهم تجربة زملائي المشتركين
مطابع داخل دولة الإمارات
https://www.descoonline.com
https://www.printarabia.ae
مطبعة ألوان @Alwan/printing
GhrapicInt.com
السوق الصيني - دبي
خارج الدولة
www.zapcreatives.com لكن اخر مرة ماعجبوني وخربو شغلي
https://www.moo.com/us/
https://www.vistaprint.com
https://www.stickermule.com
علي اكسبريس
متى موعد المعرض سنويا ومكانه؟
موعده كل سنة
في شهر 4/ أبريل او مارس ( اجازة المدارس)
لمدة ثلاث أيام، ويك اند/عطلة نهاية اسبوع
في إمارة دبي، قاعة مركز دبي التجاري
update
و تم نقله الى ابوظبي من ٢٠٢٢ لخمس سنوات
متى يفتح باب التسجيل؟
باب التسجيل يفتح قبل المعرض ب شهور غالباً شهر 9 او 10
مثلا: شهر 9. 2019
يفتتح التسجيل حق كوميكون 2020
ومب شرط يعلنون فتح باب التسجيل کوميكون حاجزين القاعه ل5 سنوات يدام
update
التسجيل ف بوظبي مفتوح قبل النعرض ب سنة كاملة، يعني يخلص المعرض اخر يوم فليل تقدرون تسجلون للسنهرالي عقبها
update
كيف أسجل؟
التسجيل سهل جدا تطلب أيميل/وتساب المسؤول من حسابهم أنستقرام وتطلب الاستماره، تعبيها ،
واذا طلبو دفع نفس الوقت. تدفع رسالتك راح تحتوي ( استمارتك +
ايصال الدفع أو الإثبات أنك دفعت،عادي تصوير | الشاشه/كابجر ) المبلغ غير قابل للاسترداد
كم سعر رسوم الإيجار؟
كان ١٥٠٠ درهم اماراتي . يشمل طاولة وكرسي وتصريح دخول واحد . لمدة ثلاث أيام كاملة
والآن زاد سعره الى 2100
لو أشتركت ليوم واحد , هل سيتم تخفيض الإيجار؟
لا. لو أشتركت يوم أو يومين أو ثلاث. لايتم تخفيض الإيجار
هل يوجد شروط أو معايير علشان يقبلون اشتراكي؟
مافيه أي شروط أو معايير لمستوى الرسام مهما كان مبتدئ وبدأ من الصفر
أهم شي تسجل ب وقت مبكر وتدفع المبلغ كامل
update
فسنة 2023 صارو يطلبون يشوفون اعمالك
.اذا كنت قرافيك ديزاينر مب رسام ،وتطبع تصاميمك ع ملابس و اكواب ف
احتمال يحولونك ع بوث وتتصنف مصمم او محل. مب طاوله
ما أقدر أتحمل تكاليف دفع إيجار الطاولة , شو الحل؟
ممكن تشاركها مع صديقك . ويكون الدفع بالمناصفة . نص بالنص
بس تحطي بعين الإعتبار أنه مساحة الطاولة صغيرة
شو أكثر منتج يشترونه؟
مافيه شي اسمه أكثر منتج يشترونه
بس حط أسعار معقولة للمنتجات العادية
واذا منتجاتك شغل يد ومجهود ، راح يشترونها حتى لوكان سعرها مرتفع
مستواي في الرسم بسيط, محتار أشترك أو لا؟
حطي في الإعتبار أن مب كل المشتركين مستوياتهم محترفة
انا أشوفها أحسن فرصه انك تتحمس تتطور
وبالنهاية القرار راجع لك
إذا أبغي أودي معاي مرافق يساعدني في البيع , كيف؟
بسيطة, تشتري له تصريح دخول عند المنظمين في القاعة .سعر التصريح بين ١70/160 حسب قرارهم
التصريح افضل من التذكره للزوار لان الزوار مب مسموح دخولهم ،غير الوقت المحدد لافتتاح المعرض .
و لما تنتهي الساعات يبدون بعمليه اخلاء الزوار
----
update
هل صاحب الطاوله او الرسام لازم يحضر بنفسه؟
لا، تقدرون تحطون مساعدین
بس الاحلی وجودكم بنفسکم توقفون وتشوفون الناس شو اکثر رسمه حبوها
face to face و تسمعون تعليقاتهم و اراءهم
هل يسمح بالمشاركه من فنانين خارج الإمارات؟
.مسموح لكل العالم، وكل الجنسيات
هل اقدر اختار مكان طاولتي ؟
ف السنوات الاخيره صار بإمكان الرسام ،يختار مكان طاولته
لان يعطونه الخريطه ف تقدرون تكونون عدال ربعكم
هل مسموح لي احضر اثاث اضافي؟
غالباً ممنوع، لكن في ن ناس تیب
هل تتوفر خدمات؟
دورات مياه ومصلی
و انصح ب تهريب السناكس لانك تحتاج طاقه ومافي وقت للاكل
=====================================================
update
في انستقرامي في الهايلايت حاطة معلومات اضافية هنـا 👇👇
وهناك الاضافات والتعديلات أسهل وأسرع بنسبالي
instagram/gmail : Moonychan91
,